Sebuah Puisi: Bogo

Bogo

[oleh Iswan Sual]

Pe sadap batidor

Kage tabangong

Barasa ada tu laeng

Barasa ada yang nya beres

            Kamar so punung asap

            Tadengar bunyi letokletok

            Bantal di sei so warna mera

            Panas muncul dari kapok

Ado!

Bingo kita mo beking apa

Pagi buta datang musiba

Ado!

Cilaka kita

Satu ruma bole mo angus karna kita

Ado!

Mampos kita

Untung api masi kacili

            Ini no, masa kwa taru obat nyamu

            Dekat bantal!

            Bukang bogo itu?

Bagimana e…

Ada ontak nda pake!

Tahuna, 1 November 2012 jam 05.35

Sebuah Puisi: Kase Qta

Kase Qta

[Oleh Iswan Sual]

kase qta captikus kalu ngoni nda becus

nda pantas ngoni jadi politikus
ngoni injang tu demokrasi
depe bobo sama deng terasi

mar ba aksi iko strat
tutu kaca stel nda kanal
padahal waktu pilkada
badiri di mimbar caricari muka

kase qta ingus kalu musti pake fulus
nda cocok ngoni pe gelar doktorandus
bagra sadiki gunting putus
for cari tu'us

kase qta nasi tustus
kalu di hati nyanda ada tulus
biar jo kita kurus
yang penting jao tu nama busu

Tataaran, 27/10/2012

Sebuah Puisi: DOE NI LAKILAKI

DOE NI LAKILAKI

Do e ni lakilaki

Tabuka tatutu mulu smo bagabu

Mangael ikang di laut maya

Jago skali dia baflas

          Badekat pa Wewene pake jarejare

          Sampe depe keyboard pung pang pung

          Bakuriki cako kata

          Depe laste parampuang tolak mantamanta

Do e ni lakilaki

Bagabs pa Keke nda lialia

Sambarang tada

Tunjung tu brani

          Nda perna sto bakaca

          Kong top bole jo

          Nda perna dia dalang hati batanya sto

          Sama langit deng bumi dong pe beda

Do e ni lakilaki

Pasang jurus ruci

Deng sagala aksi

Cumucumu orangtua pe doi

          Nya malu

          Nya sadar diri

          Tiap hari deng blackberry

          Bicara so pake gue elu

Tahuna, 4 November  2012

Sebuah Puisi: Bukang Maeng Dang

Bukang Maeng Dang

[Iswan Sual]

Bukang maeng dang

Dorang pe susa

Bis dofoma

Bis nyawa

                Mar ta salut

                Saban hari di laut

                Itang kalu itang

                Ilang kalu ilang

Untung pemerenta so sadiki sadar

Kalu nda, nae bendera Filipina

Untung penguasa so ja taru kira

Kalu nda, slamat tinggal Nusantara

                Siasia Gajah Mada pe usaha

                Nda guna sumpa Palapa

                Papua smo talapas

                Di sana punung mas

Awas le jang Marore deng Miangas baku iko

So itu kwa jang tapusat trus di Jawa

Kong torang dapa depe sisa

Ngoni kira torang biongo

                Bukang maeng dang

                Dorang pe susa

                Kalu omba kencang

                Samua warung jadi tampa ba utang

Tahuna, 1 November 2012

Sebuah Puisi: Pagi Buta di Dermaga Tahuna

Pagi Buta di Dermaga Tahuna

[Iswan Sual]

Pagi buta larilari

Bawa map biru ka dermaga

Nafas amper abis

Kapal ternyata blum ada

                Matahari masi basambunyi

                Di blakang awan

                Bibir pante mulai rame

                Buru bagasi siap angka ini itu

Wawu bilang so dekat kata

Dapa lia so di tanjung

Sangiang so senyumsenyum

Deri jao bafloit kras

                Oh pe gaga ni dermaga

                Kita saksi ngana ada

                Oh pe gaga ni Tahuna

                Enter kampung amper ta lupa

Dudu kita lia Sangiang mulai ulang bagra

Bawa barang bawa orang ka Marore

Ikangikang kacili teto dinding dermaga

Bermeng di tenga karang dorang rame

                Nda dapa rasa di sini smo tiga jam

                Langit abuabu udara laolao

                Bagitu jo trus sampe sore tre

                So lama lei kita nda totofore

Tahuna, 3 November 2012